علامك جيت ياقلبي وراجع خاطرَك مكسور
أبد لاينكسر خاطرك دامه صاحبي جاير
أبي تنسى مبادئنا وتترك طبعنا المغرور
وأبي هالحين ترجع له.. وقلّه يطلب ويامر
وإذا جت عينك بعينه أبي تشهد شهادة زور
بأني مذنب ومخطي وقلبه ناسي وغافر
وقلّه لايخليني على حزني أبات شهور
لأن الموت أشوالي وأنا من طبعي ماكابر
ولايفكّر يقول: انسى وغيري بالبشر مذكور
لأني ماخبر غيره / قسم بالله مو خابر
أحس اللي خلق زينه خلق باقي البشر ديكور
وصوفه صعب نحصرها ولاتطري على شاعر
وربي هالبشر بعده هياكل والبيوت قبور
ولابه شي بالدنيا يجاري غيابه الكافر
حبيبي يابعد كل الحبايب والزمان يدور
علامك ماتخاف الله تعال وشوفني وناظر
لك الله دنيتي عقبك ظلام ٍ ماغشاها نور
ألا يانور هالدنيا بعيني وجوّها العاطر
ترى قدرك بعيني صعب أحصِرْه بغلا وشعور
أبي باصبعك تشّر لي وأجيلك وقتها طاير
أنا من كثر مااحبك أحس إني معك مسحور
فديتك خلني مسحور إذا تبقى لي الساحر
أنا لك مثل ماودك قصيد وشاعر وجمهور
فداك اللي قصدته أمس واللي بَقصِده باكر
أنا ادري فيك خابرني شجاع وماعلي قصور
ولكن لو وصل أمري بيدّك... آآه ياساتر!!
دخيلك انتبه! لا..لا.. تمادى مع رجل مقهور
ترى قهر الرجال أكبر من اللي تحسب وفاكر
أنا حبي معك والله عفيف وطاهر ومستور
ترى صعبه تلاقي قلب شروى قلبي الطاهر
أمانه روح ياقلبي وأبي تضبط عليه الدور
أمانه طيييير له تكفى وأبي هالحين ياشاطر
أبيك تحب لي راسه وتنسى طبعنا المغرور
ترانا اثنيننا والله بدونه نكسر الخاطر
موضوع: علامك 
الإثنين 11 فبراير - 3:12
