أبي أعشق وأبي أغرم وببني للهوى بنيان

أبي أبكي من الضيقه وابعزف للهموم الحان
أبي أطلق مواويل الحزن وبطرح كل دواويني


أبي أشكي أبي أحكي أبوصف للبشر حرمان
أبيهم كلهم يدرون أبيهم يشعروا فيني


أبي لا من طرى إسمي بكى من لوعتي شيبان
أبي لا من طرى عاشق ذكر من كان يغليني


أبيهم يذكرون اني صرت بدمعتي غرقان
أبيهم يعرفون الهم هو اللي صار يخاويني


أبي أصرخ وابلغهم واقول إن الفرح خوّان
يجي مره معاي وهو طول العمر ناسيني


أبي أترك لهم قصه واخيّرهم على العنوان
يسمّوا "حزن " يحطوا "دمع" .. ما عاد يعنيني


أبي لا من وصل صوتي يحس بضيقتي إنسان
أبي لا من نزف جرحي لقيت اللي يداويني


أبي شخصٍ يجي يمي ويقفل للعنا بيبان
أبيه يكون لي خلٍ وعلى حزني يواسيني


أبيه لمركبي مرسى وأبيه لغربتي أوطان
أبي لا من ذرفت الدمع لقيته لي يعزّيني


أنا ما ابيه يصبح ضلع أبيه يكون لي ضلعان
أبي لا من مشيت وطحت يحط يديه في يديني


إٍلامِن خانني التعبير أبيه يكون لي لسان
أبي لا من سكتّ ألقاه .. يفهم من نظر عيني


أبي لا من تعبت وضقت يلم الروح بالأحضان
أبيه يكون لي كتاب إذا ضاعت عناويني


أبي أعشق وأبي أغرم وببني للهوى بنيان
أبيه يكون مبنى ضخم ويسكن فيه مغليني


أبي واحد يسكن بي وابطرد لاجله السكّان
أبي يسكن وسط قلبي وعمره ما يخليني


أبي أشعل شموع الحب وباعطي من الغلا بستان
أبي أهديه باقة ورد .. مسقيها شراييني






مما أعجبنــــــــي


دمتم بـــــــــــــــــود